Шымкент қаласы Еңбекші ауданына қарасты Бадам-1 және Бадам-2 тұрғын алаптарында Наурыз мерекесі қасиетті Ораза айтпен бірге ерекше көңіл-күймен атап өтілді. Көктем мен жаңару мейрамы ауыл шетіндегі қазақ дәстүріне сай ұйымдастырылып, ұлттық рухқа толы атмосфера сыйлады.
Мерекеге 6 мыңнан астам адам жиналып, 30-ға жуық киіз үй тігілуімен салтанатты жиындық өтті. Тұрғындар ғана емес, қала қонақтары, ауылдың аға буын өкілдері және аудан билігі де осы думанды тойға белсенді қатысты. Шараны ауылдың 1991-1992 жылдары туылған жастары ұйымдастырған болатын, бұл бастама ауыл тұрғындарының ынтымағы мен ауызбіршілігін айқындап, қазақ дәстүрінің жаңғыруына үлес қосты.
Мерекелік жиындықта Шымкент қаласы Еңбекші ауданының әкімі Есілбек Досбол сөз сөйлеп, Наурыздың тек табиғаттың емес, адамзаттың да жаңаруын білдіретін мейрам екендігін атап өтті. Ол былай деді:
– Бізден кейінгі жастар бізге қарап бой түзейді. Ұлыстың ұлы күнінде үлкендеріміз батасын беріп, жастарымыз ынтымақ танытса, бұл – елдіктің белгісі. Алдағы уақытта Наурыз мейрамы өзге де елді мекендерде жалғасын табады.
Ауылдың Наурызы жылдағыдан ерекше өтті. Киіз үйлер тігіліп, ошақта қазан көтеріліп, келушілер ұлттық тағамдар мен наурыз көже дәмін татып, мерекелік көңілділікке бөленді. Ат шаптырып, балуандар белдесіп, балалар асық ойнап, алтыбақан тепті – осы күн шынайы қазақ ауылындағы мерекенің көрінісі болды.
Сахна төрінде мектеп оқушыларының шеберлігінен бөлек, елімізге танымал өнер жұлдыздары ән-жырдан шашып, ұлттық би билеп, Наурыздың шат-шадыман көңілін асқақтатты.
Бадам ауылының бұл Наурызы тек бір күндік той ғана емес, бірлігі мен дәстүрге толы қоғамның, тамыры терең салт-дәстүрдің символына айналды.