Түркістан облысында 2025-2029 жылдарға арналған туризмді дамыту іс-шаралары әзірленді. Облыс әкімі Нұралхан Көшеров туристік әлеует толық пайдаланылмай тұрғанын атап, туристік нысандарды ретке келтіру және іс-шаралар жоспарын тез бекіту қажеттігін тапсырды.
Облыстық туризм басқармасы басшысы Нұрдәулет Медеуовтің айтуынша, 2029 жылға дейін облысқа келетін туристер санын 1 млн-ға, олардың ішінде орналастыру орындарында – 550 мың, табиғи аумақтарда – 200 мың, емдік-сауықтыру орындарында – 250 мың адамға жеткізу көзделуде.
Сонымен қатар, аймақта инвестицияларды тарту арқылы жаңа туристік бағыттар (агротуризм, спелеотуризм, экстремальді туризм, сафари туризм және жаңа мұражайлар) іске асырылып, этно, эко және курорттық кластерлер негізінде туристік инфрақұрылым дамытылады.
Халықаралық туристік дестинацияларда Turkistan City Pass электрондық туристік картасы іске қосылып, мұражайлар, қонақүйлер, ресторандар, такси қызметтері және басқа да қызметтер біріккен түрде ұсынылады. Өткен жылы Италия нарығында таныстырылған бағдарламалар бойынша 2025 жылы 24 топтың (әр топта 20-25 турист) аймаққа келуі күтілуде.