Қазақстан Республикасының Президенті Қасым-Жомарт Тоқаевтың 2025 жылғы 8 қыркүйектегі Қазақстан халқына Жолдауында еліміздің дамуындағы маңызды стратегиялық бағыттар айқындалды.
«Бүгінде әлемде транзиттік бағыттар үшін бәсекелестік күрт артып келеді. Арзан балама жолдар мен жаңа халықаралық бағыттар үнемі ұсынылуда. Осындай жаһандық жағдайда Қазақстан алдын ала әрекет етіп, әрдайым бір қадам алда болуы тиіс. Бұл еліміздің транзиттік әлеуетін барынша арттыруға, сондай-ақ халықаралық көлік дәліздеріндегі орнын нығайтуға мүмкіндік береді», – деді Президент.
Сондай-ақ Мемлекет басшысы қуат көздерін жаңғыртудың, баламалы және жасыл энергияны дамытудың өзектілігіне ерекше назар аударды. «Қазіргі таңда шетелдік инвесторлардың қатысуымен елімізде бірқатар ірі жобалар іске асырылуда. Алдағы бес жыл ішінде жалпы қуаты 6,3 гигаватт болатын “жасыл” энергия нысандарын іске қосу жоспарланып отыр», – деді Президент. Бұл бастамалар елдің орнықты дамуына, энергетикалық қауіпсіздігін қамтамасыз етуге және халықаралық деңгейдегі бәсекеге қабілеттілігін арттыруға бағытталған.
«Жасыл экономикаға көшу – бұл тек экологиялық қажеттілік қана емес, сонымен қатар болашақ ұрпақ үшін таза әрі қауіпсіз орта қалыптастыру жолы», – деді Президент.
Қазақстан климаттың өзгеруіне қарсы күресте жаһандық қауымдастықтың сенімді серіктесіне айналуға ниетті. Қайта жаңғыртылатын энергия көздеріне инвестиция тарту арқылы жаңа жұмыс орындары құрылып, отандық ғылым мен технологияның дамуына жол ашылады. Сонымен қатар, көлік-логистика саласында «Жаңа Жібек жолы», Транскаспий халықаралық көлік бағыты және басқа да бастамалар еліміздің геосаяси маңызын арттыруда.
«Біз Еуразия құрлығының жүрегінде орналасқан транзиттік хаб ретінде өз рөлімізді тиімді пайдалануымыз керек», – деді Президент.
Осы мақсатта теміржол, автомобиль, әуе және теңіз көлік инфрақұрылымын дамыту бағытында кешенді шаралар қабылдануда.
Жолдауда көрсетілген жаңа стратегиялық басымдықтар еліміздің ұзақ мерзімді дамуына, халықтың әл-ауқатын арттыруға және Қазақстанды Орталық Азиядағы көшбасшы мемлекет ретінде орнықтыруға бағытталған.
«Бұл – әрбір азаматтың әл-ауқаты үшін, келешек ұрпақ үшін жасалып жатқан маңызды қадам», – деді Президент.