Шымкент қаласы ішкі саясат және жастар істері жөніндегі басқармасының Жастар ресурстық орталығының ұйымдастыруымен 8 қазан күні басталған «Жайдарман» лигасының жартылай финал ойыны өтті.
Жастардың интеллектуалды ойлау қабілетін арттыру, жастарды ұлтжандылық пен шығармашылыққа тәрбиелеу, жастар арасында мемлекеттік тіл мәртебесін көтеру мақсатында бастау алған ойында, «Жайдарман» лигасының 1\4 ширек финалынынан өткен 8 команда ойын көрсетті.
«Жайдарман» әзілқойлар мен тапқырлар сайысының мақсаты — жастарды мәдениеттілікке тәрбиелеу, интеллектуалды деңгейін көтеру және өмірлік дұрыс бағыт-бағдар бере отырып, жастардың өмірде өз орнын дұрыс таба білуіне баулу. Сонымен қатар елімізде жүргізіліп жатқан саяси реформаларды кеңінен насихаттау,-дейді ұйымдастырушылар.
Әділ қазылар қатарында Нысана театрының актері, ардагер жайдарманшы Абай Аязбаев, Шымкент қаласы ішкі саясат және жастар істері жөніндегі басқарма басшысының орынбасары Серғазы Әбілхаиров, «Миллион» командасының мүшесі, «Жайдарман» ойындарының 2021 жылғы чемпионы Мансар Орынхан, әнші Әбдіжаппар Әлқожа мен 2021 жылғы жайдарман ойынының жоғары лига чемпионы, «Жездуха» жобасының актері Мақсат Бөбей төрелік етті.
Қаламыздағы жоғары және орта арнаулы оқу орындарының жастарынан құрылған ойында әділ-қазылар алқасының шешімімен 5 команда финалға жолдама алды.