Өткен аптада ҚР Премьер-Министрдің орынбасары – Сыртқы істер министрі Мұрат Нұртілеу бастаған делегация Ауғанстанға жұмыс сапарымен барды. Орталық Азия мен Оңтүстік Азия арасындағы стратегиялық теміржол жобасын дамытуға бағытталған маңызды құжатқа қол қойды. Бұл тарихи келісім – Қазақстанның көлік-логистика саласындағы жаңа белесі ғана емес, тұтас аймақ үшін геосаяси және экономикалық серпіліс әкелетін бастама.
Келісімге сәйкес, Ауғанстан аумағында «Тургунди – Герат – Кандагар – Спин-Болдак» бағыты бойынша жаңа теміржол желісі салынады. Бұл жобаның алғашқы кезеңінде «Тургунди – Герат» теміржол желісі мен инфрақұрылымдарын, сондай-ақ Герат қаласындағы көлік-логистикалық орталықты іске қосу көзделген. Жолдың жалғасы Пәкістанның маңызды шекаралық бекеті – Спин-Болдак арқылы Карачи мен Гвадар порттарына дейін жетеді. Бұл бағыт Қазақстан үшін Оңтүстік Азия нарығына ашылар жаңа «қақпа» болмақ.
Жобаның Қазақстан үшін маңызын асыра айту қиын. Бүгінде ел экономикасының қозғаушы күштерінің бірі – транзиттік тасымал. Жаңа теміржол дәлізі еліміздің географиялық артықшылығын тиімді пайдалануға жол ашады. Қытай мен Ресейден шығатын жүк ағындарын Ауғанстан мен Пәкістан арқылы Парсы шығанағы елдеріне жеткізу – логистикалық тұрғыдан тиімді, саяси-экономикалық жағынан маңызды.
Сонымен қатар, қазақстандық өнімдер – астық, мұнай өнімдері, көмір мен тыңайтқыш – осы жаңа дәліз арқылы Оңтүстік Азияға тікелей жеткізілетін болады. Бұл тасымалдың жылдамдығын арттырып, құнын төмендетіп, экспорттың бәсекеге қабілеттілігін күшейтеді. Демек, бұл бағыт – тек көлік желісі ғана емес, экспорттық стратегияның бір тармағына айналмақ.
CASA теміржол жобасы – тек экономикалық бастама емес, бұл – саяси ықпалдастықтың, өңірлік сенім мен ынтымақтастықтың көрінісі. Қазақстан, Өзбекстан, Ауғанстан мен Пәкістанның бірлескен іс-қимылы – Орталық және Оңтүстік Азияның өзара байланысын нығайтады, тұтас аймақтың тұрақтылығы мен дамуына серпін береді.
Ауғанстан аумағындағы көлік инфрақұрылымының дамуы – бұл елдің экономикасын қайта қалпына келтіруге ықпал етсе, Қазақстан үшін жаңа нарықтар мен транзиттік табыстың көзіне айналады.
Қазақстанның мұндай бастамаларға бастамашы болуы – елдің сыртқы саясатының прагматизмін, бейбітшіл және серіктестікке негізделген бағытын айқындайды. Жаңа теміржол дәлізі – елдің халықаралық аренадағы көлік-логистикалық хаб ретіндегі рөлін айшықтай түседі.
Қысқасы, CASA теміржол жобасы – Қазақстанның стратегиялық болашағына салынған инвестиция. Ол еліміздің экономикалық қуатын арттырып қана қоймай, оны Орталық және Оңтүстік Азия арасындағы көпірге айналдырады. Бұл жол – даму жолы, тұрақтылық жолы, жаңа көкжиектерге апарар жол.