Шымкент қаласының ерікті жастары «Таза Қазақстан» экологиялық акциясы аясында табиғатты қорғауға бағытталған игі шара ұйымдастырды. Маятас демалыс аймағында өткен тазалық жұмыстары «Тарихи күндер тізбегімен» атты өңірлік мәдени-танымдық фестиваль қарсаңында өтті.
Шараның басты мақсаты — табиғи аумақтың тазалығын сақтау және экологиялық мәдениетті дамыту. Сонымен қатар, алдағы фестивальге қолайлы орта дайындау — акцияның маңызды міндеттерінің бірі болды.
Тазалық жұмыстары кезінде еріктілер қураған бұтақтарды жинап, күл-қоқысты тазалады. Демалыс орнының айналасы абаттандырылып, экологиялық жағдай жақсарды. Бұл — жастардың табиғатқа жанашырлықпен қарауына бағытталған нақты қадам.
Шараға 100-ге жуық ерікті жас қатысып, өздерінің белсенді азаматтық ұстанымдарын көрсетті. Ұйымдастырушылар мен қатысушылар бірлесіп жұмыс істеп, экологиялық мәдениетті қалыптастыруға үлес қосты. Жастардың бұл бастамасы табиғатты қорғауға шақырумен қатар, қоғамда экологиялық жауапкершілік сезімін күшейтеді.
Айта кетейік, бұған дейін Шымкент жастары «Taza Alem» атты кең көлемді экологиялық акция өткізген еді. Сол жолы қала маңындағы Бадам су қоймасында 500-ге жуық ерікті тазалық жұмыстарына жұмылдырылды.
Бұл шараға «Жастар ресурстық орталығы» қызметкерлері, еріктілер қозғалысы және коммуналдық мекемелер өкілдері белсене қатысты. Су қоймасы жағалауындағы пластик, шыны және тұрмыстық қалдықтар жиналды. Қоқысты шығару үшін 7 арнайы техника тартылды.
Аталған акциялар — табиғатты қорғауға бағытталған жүйелі жұмыстардың жалғасы. Шымкенттің жастары мұндай шараларды алдағы уақытта да тұрақты түрде ұйымдастыруға ниетті. Олар қоршаған ортаның тазалығы мен сақталуына өз үлестерін қоса бермек.
Экологиялық акциялар — табиғатқа қамқорлықпен қараудың көрінісі. Бұл бастамалар жастардың экологиялық санасын арттырып, қоғамды табиғатты қорғауға шақырады.