Шымкенттегі мешіттер 18 мамырдан бастап ашылады. Бұл жөнінде Қазақстан мұсылмандары діни басқармасының Шымкент қаласы бойынша бас имамы Бақдәулет Абдрахманов онлайн-брифингте мәлімдеді.
Брифинг барысында Қасиетті Қадір кеші мен Айт мерекесін өткізу туралы, сондай-ақ құлшылық үйіне келуші азаматтарға қойылатын талаптар жайында жан-жақты ақпарат бере кетті.
«Елімізде төтенше жағдай мерзімі аяқталып, халқымыз қалыпты өмір тіршілігіне ауыса бастады. Осы орайда, Қазақстан мұсылмандары діни басқармасының төрағасы, Бас мүфти Наурызбай қажы Тағанұлының үндеуіне сәйкес, елімізде 18 мамырдан бастап барлық мешіттер арнайы санитарлық талаптарды сақтай отырып ашылады. Осы уақыттан бастап мұсылман қауымының жеке құлшылық жасауына, Құран оқытып, неке қидыруына болады»,-деді Шымкент қаласының бас имамы Бақдәулет Абдрахманов.
Дегенмен карантин талаптары сақталады. Жамағатпен оқылатын бес уақыт, жұма, тарауық намаздарына қатысты қойған уақытша шектеуді өз күшінде қалады. Тек жекелеген түрде намаз оқуға рұқсат етіледі. Мешітте болу уақыт ұзақтығы 15 минут және намаз оқушылардың арақашықтығы 1,5 метр болуы керек. Сондай-ақ бас имам қасиетті Қадір кешін үйде өткізуге шақырды.
«Биылғы Рамазанның қасиетті Қадір кеші мамыр айының 19-ынан 20-сына қараған түнге сәйкес келіп отыр. 19 мамырда мешіт таңғы сағат 7:00 мен кешкі 20:00 аралығында жұмыс істейді. Осы ретте баршаңызды Қадір кешін өз үйлеріңізде өткізуге шақырамын. Тәртіпке бағынуды сұраймыз», — деп атап өтті Бақдәулет Абдрахманов.
Айта кетсек, бүгінгі таңда Шымкент қаласында 106 мешіт бар.
Bozyq.kz