Шымкент қаласында шағын және орта бизнестің (ШОБ) дамуы қарқынды жалғасып келеді. Өткен жылдың қорытындысы бойынша мегаполистегі ШОБ субъектілері өндірген өнім көлемі 4 684 млрд теңгені құрап, алдыңғы жылмен салыстырғанда 34,5 пайызға артты.
Қалада бүгінде 141 957 шағын және орта кәсіпкерлік субъектісі жұмыс істейді. Сонымен қатар, бұл салада жұмыспен қамтылғандар саны 259 мың адамға жетіп, өткен жылмен салыстырғанда 5,9 пайызға өсті. Нәтижесінде Шымкент өңірлер арасында осы көрсеткіш бойынша екінші орынға көтерілді.
Сарапшылардың пікірінше, кәсіпкерлік белсенділіктің артуы ел экономикасының жалпы өсіміне де оң ықпал етуде. Мұны мемлекеттік бюджет кірістерінің көрсеткіштері де растайды.
Қазақстан Республикасы Қаржы министрлігінің мәліметінше, 2026 жылдың қаңтар-мамыр айлары аралығында мемлекеттік бюджетке 11,4 трлн теңгеден астам қаражат түсіп, жоспарланған көрсеткіштен асыра орындалған. Бұл өткен жылдың сәйкес кезеңімен салыстырғанда 16 пайызға жоғары.
Республикалық бюджеттің кірісі 100,9 пайыз орындалып, жоспарланған 7,34 трлн теңгенің орнына 7,41 трлн теңге түскен. Нәтижесінде бюджетке жоспардан тыс қосымша 66,7 млрд теңге түсті. Ал республикалық бюджет кірістерінің өсімі өткен жылмен салыстырғанда 25,1 пайызға немесе 1,48 трлн теңгеге артқан.
Жергілікті бюджеттердің кірісі де оң динамика көрсетіп, 4,05 трлн теңгеге жетті. Бұл былтырғы жылдың осы кезеңімен салыстырғанда 95,1 млрд теңгеге немесе 2,4 пайызға көп.
Қаржы министрлігі кірістердің артуын экономиканың тұрақты өсуімен, іскерлік белсенділіктің күшеюімен және салықтық түсімдердің көбеюімен байланыстырады. Әсіресе қосылған құн салығы, корпоративтік табыс салығы, пайдалы қазбаларды өндіру салығы және шикі мұнай экспортына салынатын кедендік баж бойынша түсімдер айтарлықтай артқан.
Мемлекет даму бюджетін сақтай отырып, инфрақұрылымдық жобаларды қаржыландыруды жалғастыруда. Атап айтқанда, автомобиль жолдарын салу және жаңғырту, инженерлік-коммуналдық желілерді жетілдіру, көлік-логистикалық дәліздерді дамыту, энергетика, сумен жабдықтау және цифрландыру салаларындағы жобаларға басымдық берілуде.
Осылайша, Шымкенттегі кәсіпкерліктің серпінді дамуы мен елдегі экономикалық белсенділіктің артуы мемлекеттік бюджет кірістерінің өсуіне ықпал етіп, өңірлердің тұрақты дамуына және жаңа жұмыс орындарының ашылуына мүмкіндік жасап отыр.