Жыл сайын 5 маусымда әлемде Халықаралық қоршаған ортаны қорғау күні атап өтіледі. Бұл күн табиғатты қорғаудың маңызын насихаттауға, экологиялық мәселелерге қоғамның назарын аударуға және қоршаған ортаға деген жауапкершілікті арттыруға бағытталған. Сонымен қатар, Қазақстанда бұл күн Эколог күні ретінде аталып өтіп, табиғатты қорғау саласында еңбек етіп жүрген мамандардың еңбегі дәріптеледі.
Қоршаған орта – адам өмірінің ажырамас бөлігі. Таза ауа, мөлдір су және құнарлы жер халықтың денсаулығы мен өмір сүру сапасына тікелей әсер етеді. Сондықтан табиғатты қорғау және экологиялық мәдениетті қалыптастыру – әрбір азаматтың ортақ міндеті.
Осыған орай, Шымкент қалалық колледж студенттері арасында Қошқар ата өзенінің жағалауында «Эколог сағаты» республикалық акциясы өтті. Іс-шараның негізгі мақсаты – жастардың экологиялық мәдениетін қалыптастыру, қоршаған ортаны қорғауға деген жауапкершілігін арттыру және табиғатты аялау құндылықтарын насихаттау.
Акция барысында студенттерге қоршаған ортаны қорғаудың маңыздылығы түсіндіріліп, экологиялық мәселелерді шешудегі әр азаматтың рөлі кеңінен талқыланды.
Сонымен қатар, қатысушылар Қошқар ата өзенінің жағалауында тазалық жұмыстарын жүргізіп, табиғи аумақтың тазалығы мен көркеюіне өз үлестерін қосты. Студенттердің белсенді қатысуы олардың табиғатқа деген жанашырлығын көрсетіп, экологиялық жауапкершілігін арттыруға ықпал етті.
«Эколог сағаты» республикалық акциясы аясында өткізілген бұл іс-шара қоршаған ортаны қорғау ісіне қоғамның назарын аударып қана қоймай, жастар арасында экологиялық сананы қалыптастыруға және табиғатты қорғау мәдениетін нығайтуға өз үлесін қосты.
Табиғатты қорғау – бүгінгі күннің басты міндеттерінің бірі. Қошқар ата жағалауында өткен акция жастардың экологиялық жауапкершілігін арттырып, туған өлкенің табиғатын сақтауға деген ұмтылысын айқындай түсті.