Шымкентте 10 тамыз – Абай күніне орай ұлттық зияткерлік ойынды дәріптеуге бағытталған спорттық шара өтті.
Шымкент қаласының дене шынықтыру және спорт басқармасы мен Шымкент қаласының тоғызқұмалақ федерациясының ұйымдастыруымен ерлер арасында тоғызқұмалақтан «Абай мұрасы – ұлт қазынасы» атты Шымкент қаласының чемпионаты ұйымдастырылды.
Жарысқа 20-дан астам спортшы қатысып, классика және блиц бағдарламалары бойынша өзара бақ сынады. Қатысушылар ойын барысында шеберліктерін көрсетіп, тактикалық ойлау қабілеті мен зияткерлік дайындығын сарапқа салды. Тартысты өткен бәсекеде спортшылар жоғары нәтижеге жету үшін бар күш-жігерін жұмсады.
Чемпионат қорытындысы бойынша үздік нәтиже көрсеткен алты спортшы қыркүйек айында Ақтау қаласында өтетін Қазақстан Республикасының чемпионатына жолдама алды. Бұл – қала спортшылары үшін республикалық деңгейдегі жарыста Шымкенттің намысын қорғауға берілген маңызды мүмкіндік.
Спорттық шараға қалалық дене шынықтыру және спорт басқармасының қызметкерлері, Шымкент қаласының тоғызқұмалақ федерациясының президенті Алмас Өмірбекұлы, аға жаттықтырушы Сабит Қалдыбекұлы, спортшылар және бұқаралық ақпарат құралдарының өкілдері қатысты.
Шара барысында ұлттық ойынның тәрбиелік және танымдық мәніне де ерекше назар аударылды.
Абай мұрасын ұлттық спортпен сабақтастыра отырып өткізілген чемпионат ұлы ойшылдың рухани құндылықтарын дәріптеуге және ұлттық ойынға деген қызығушылықты арттыруға мүмкіндік берді.
Жарыстың Абай күніне орай ұйымдастырылуы ұлттық спорт пен рухани мұраның сабақтастығын айқындай түсті.
Ұлттық ойынның осындай ауқымды додалар арқылы кеңінен насихатталуы өскелең ұрпақтың зияткерлік қабілетін дамытуға және ұлттық құндылықтарға деген құрметін арттыруға ықпал етеді. Алдағы уақытта тоғызқұмалақты одан әрі дамыту бағытындағы жұмыстар жалғасып, Шымкент спортшылары республикалық және халықаралық жарыстарда жоғары нәтижелер көрсетуге күш салатын болады.