Шымсити паркінде «Адамзаттың перзенті – Ұлы Абай» атты концерттік кеш өтті. Шымкент қаласының өнер ұжымдары мен танымал орындаушылары қала тұрғындары мен қонақтарына Абайдың халық сүйіп тыңдайтын музыкалық туындыларын шырқап, арнайы дайындалған концерттік бағдарлама ұсынды.
Іс-шараның мақсаты — хакімнің шығармашылығын кеңінен насихаттау, көркем әдебиетті, поэзияны, әндерін сүйіп тыңдайтын қала тұрғындарының рухани танымын кеңейту, театр құндылықтарын көрсете отырып көрермендер қатарын арттыру.
Кеш барысында қазақтың ұлы ақыны, ойшылы Абай Құнанбайұлының шығармашылығынан әндер орындалды.
Атап айтқанда, Шымкент қалалық Ж.Шанин атындағы қазақ дарама театрының әртістері «Абай ауылы» прологын көркем түрде көрсетіп, “Шымкент концерт” концерттік ұйымы және Шымкент қалалық опера және балет театрының әншілерінің орындауында Л.Хамиди, А.Жұбановтың «Абай» операсынан «Тойбастар», Хор әртістерінің орындауында «Қарлығаш» және Абайдың «Айттым сәлем Қаламқас», «Желсіз түнде жарық ай», «Көзімнің қарасы» т.б. әндері шырқалды.
«Біз Абайдың өлеңдерін оқып, оның шығармаларынан тәлім алып өстік. Абайдың әрбір сөзі мен ойының астарында үлкен тәрбие, білім мен адамгершілік жатыр. Сондықтан бүгінгі жастар да ұлы ақынның мұрасын терең оқып, одан тағылым алып, білімді әрі саналы азамат болып өсуі керек деп ойлаймын. Абай шығармаларын осындай іс-шаралар арқылы кеңінен насихаттау – өте дұрыс бастама. Бұл жастардың ұлттық құндылықтарға деген қызығушылығын арттырып, рухани тұрғыдан қалыптасуына оң әсер етеді», – дейді Темірхан Әбжәмілов.
Іс-шарада қала тұрғындар мен қонақтары хакімнің қара сөздері мен поэзиясынан қуат алып, керемет әсерге бөленді.
Абай мұрасы — өшпес қазына. Бүгін шаһарда ұлы ақын, ойшыл, Абай Құнанбайұлының бай рухани мұрасын дәріптеуге бағытталған бірқатар іс-шаралар өткізіліп, мереке кең көлемде аталып өтті.