Шымкент қаласында «Тіл және технология: тілдің жаңа тынысы» атты қалалық фестиваль өтті.

Шымкент қаласы білім басқармасына қарасты «Қаратау» дәстүрлі ұлттық өнер мектебінде ұйымдастырылған шараға білім беру ұйымдарының басшылары, тіл жанашырлары және қазақ, орыс, өзбек, ағылшын тілі мен әдебиеті пәндерінің 250-ге жуық педагогі қатысты.
Фестивальде мемлекеттік тілдің қолданыс аясын кеңейту, тіл үйретудің заманауи тәсілдерін қолдану және этносаралық достықты тіл арқылы нығайту мәселелері қаралды.

Педагогтерге тіл үйрету үдерісінде заманауи технологиялар мен цифрлық құралдарды тиімді пайдалану бағытындағы жобалар таныстырылды. Сонымен қатар бірнеше тілдің өзара сабақтастығы мен тіл арқылы мәдениетаралық байланысты дамыту жолдары сөз болды.
Онкүндік аясында оқушылар арасында пікірталастар, эссе байқаулары, дөңгелек үстелдер мен ашық сабақтар өткізілді. Ахмет Байтұрсынұлының өмірі мен ағартушылық мұрасына арналған көрмелер де ұйымдастырылды.
Әдістемелік орталық директорының орынбасары Шолпан Айтбаеваның мәліметінше, 2-11 қыркүйек аралығында қосымша білім беру ұйымдарын қоса алғанда, 306 мекемеде түрлі іс-шара өткізілген. Оның 168-інде оқыту қазақ тілінде, ал 142 мектепте білім беру аралас тілде жүргізіледі.
Фестивальдің негізгі тақырыптарының бірі — қазақ тілін цифрлық кеңістікте дамыту. Жиын барысында жасанды интеллектінің тіл үйрету мен тіл дамытудағы мүмкіндіктері талқыланып, цифрлық технологияларды білім беру үдерісінде қолдану тәжірибелері ұсынылды.
Фестиваль қорытындысында тіл үйрету мен насихаттаудың дәстүрлі тәсілдерімен қатар, цифрлық мүмкіндіктерді тиімді пайдалану қажеттігі атап өтілді. Жиынға қатысушылар тілдерді оқытудағы жаңа әдістер бойынша өзара тәжірибе алмасты.
Қорытынды шарада тілдер онкүндігі барысында белсенділік танытқан оқушылар, мұғалімдер мен мектеп директорлары марапатталды.