Ирландияның Дублин қаласында өткен IGeO-2024 география бойынша халықаралық олимпиадада қазақстандық оқушылар жоғары нәтижелерге қол жеткізді. Оған әлемнің 50 елінен 200-ге жуық оқушы қатысты, деп хабарлайды Оқу-ағарту министрлігінің баспасөз қызметі.
IGeO олимпиадасы 1996 жылдан бастап Халықаралық географиялық одақтың (IGU) қолдауымен өткізіліп келеді. Биыл Қазақстан командасы 100% нәтиже көрсетіп, бір күміс және үш қола медаль жеңіп алды. Олар:
Ақжол Болат — Талдыкорған қаласындағы физика-математика бағытындағы Назарбаев Зияткерлік мектебінің 11-сынып оқушысы;
Жомарт Сабыр — Жамбыл облысындағы дарынды балаларға арналған мамандандырылған «Дарын» лицей-интернатының 11-сынып оқушысы;
Арсен Сыдықов — Шымкент қаласындағы химия-биология бағытындағы Назарбаев Зияткерлік мектебінің 11-сынып оқушысы;
Қанат Серікбай — Шымкент қаласындағы химия-биология бағытындағы Назарбаев Зияткерлік мектебінің 11-сынып оқушысы.
Команда жетекшілері: Нұрлан Жұмагелді — «Дарын» РҒПО директордың орынбасары және Мақсат Аубакиров — «Дарын» РҒПО бөлім басшысы.
Жыл сайын өтетін Халықаралық IGeO-2024 олимпиадасында Шымкент қаласындағы химия-биология бағытындағы Назарбаев Зияткерлік мектебінің 12-сынып оқушылары Арсен Сыдыков пен Қанат Серікбай топ жарды.
Байқау нәтижесінде NIS оқушылары қола медаль иегерлері атанды.
Еске сала кетсек, жақында Сербияның Капаоник қаласында өткен географиядан Х Еуропалық олимпиадада Шымкент қаласындағы химия-биология бағытындағы Назарбаев Зияткерлік мектебінің 11-сынып оқушысы Арсен Сыдықов алтын, ал Қанат Серікбай күміс медальдарға ие болған. Басқа да беделді халықаралық және республикалық олимпиадаларда үздік нәтиже көрсеткен.