Бүгін Түркістан облысының құрылғанына 7 жыл толып отыр. 2018 жылы Елбасы Жарлығымен жаңадан құрылған облыс аз уақыт ішінде ел экономикасының, рухани өмірі мен мәдениетінің маңызды орталығына айналды.
Өңірде әлеуметтік-экономикалық даму көрсеткіштері қарқынды өсіп, бірқатар стратегиялық жобалар жүзеге асуда.
Жалпы өңірлік өнім – 2,6 есе өсті
2018 жылы 1,7 трлн теңге болған жалпы өңірлік өнім көлемі бүгінде 4,5 трлн теңгеге жетіп отыр. Бұл — облыс экономикасының жылдан-жылға күшейіп келе жатқанын көрсетеді.
Өнеркәсіп – 1,2 трлн теңгеден асты
Соңғы жеті жыл ішінде облыстың өнеркәсіп өнімінің көлемі 2,7 есе артып, 1,2 трлн теңгеге жетті (2018 ж. — 438,6 млрд теңге).
Облыс аумағында 19 индустриалды аймақ пен арнайы экономикалық аймақтар құрылған. Бұл аймақтарда 52 кәсіпорын 42,4 млрд теңгенің өнімін өндіріп отыр. Қазіргі таңда 57 жоба бойынша 195,4 млрд теңгенің құрылыс жұмыстары жүргізілуде.
Бұдан бөлек, алғаш рет 100 гектар аумақта «Шағын өнеркәсіптік парк» жобасы іске қосылды.
Ауыл шаруашылығы – көшбасшы сала
Ауыл шаруашылығы саласында да өсім айқын байқалады. 2018 жылы 548,7 млрд теңге болған өнім көлемі бүгінде 1 трлн теңгеден асып отыр. Бұл көрсеткіш бойынша Түркістан облысы республикада алдыңғы орында.
Агроөнеркәсіп кешеніне соңғы 7 жылда 700 млрд теңгеден астам инвестиция тартылған.
Инвестиция – 4,2 есе артты
Облыс экономикасына тартылған инвестиция көлемі 2018 жылғы 314,1 млрд теңгеден 2024 жылы 1 335,0 млрд теңгеге жетіп, 4,2 есеге өсті.
Биылғы жылдың алғашқы бес айында 387,8 млрд теңге инвестиция тартылған. Оның ішінде 199,3 млрд теңгесі – жеке, 128,7 млрд теңгесі – бюджет есебінен.
Тікелей шетелдік инвестиция көлемі 1 млрд 144,2 млн АҚШ долларын құрап, жылдық жоспар (467 млн доллар) 245%-ға артығымен орындалды.
Туризм – 442,6 млрд теңге тартылды
Соңғы 7 жылда туризм саласына 442,6 млрд теңге инвестиция құйылып, 18 мыңнан астам жұмыс орны ашылды. Қожа Ахмет Ясауи кесенесі мен тарихи-мәдени мұра нысандарына келушілер саны артып, Түркістан халықаралық туристік орталыққа айналып келеді.
Тәуелсіз Қазақстанның рухани астанасы саналатын Түркістанның болашағы жарқын. Өңірдің дамуы елдік мұраттармен үндесіп, жаңғырудың үлгісіне айналып отыр.