Балық шаруашылығын дамыту Мемлекет басшысының алға қойған маңызды міндеттерінің бірі. Осыған орай, Төлеби ауданының аудан әкімі Еркеғали Әлімқұлов Киелітас ауылдық округіндегі «Fish House» ЖШС-на арнайы барып, балық шаруашылығын қолға алған серіктестік жұмысымен танысты. Жеке кәсіпкер Нұртас Шағыров аудан әкіміне балық шабақтары жіберілген арнайы бассейндерді көрсетіп, алдағы жұмыс жоспарымен бөлісті.
️
Кәсіпкер балықтың сазан және форель түрін уылдырық арқылы көбейтіп, арнайы жасалған тоғандарда бекіре балығын өсіруді қолға алған. Инвестиция құны – 400 млн теңге. Арнайы жасалған бассейндерге 15 тонна сазан шабағы, 60 тонна форель, 3 тонна бекіре тұқымдас балығын жіберген. Кәсіпкер бүгінгі таңда 50 ауыл тұрғынын уақытша жұмыс орнымен қамтып отыр. Алдағы уақытта 30 адамды тұрақты жұмысқа тарту көзделген. Сонымен қатар, қожалық иесі өз қаржысы есебінен жол бойына замануи балалар ойын алаңшасын салып, халыққа пайдалануға беруді жоспарлауда.
Кәсіпкер форель балығын салқын кезде арнайы орында өсіріп, күз мезгілінде ашық бассейнге жіберетінін айтты. Бұған қоса, ауданға келуші туристерге балықтың бірнеше түрін ұсынып, этно стильде дәмхана ғимаратының құрылысын жүргізетінін жеткізді. Тоған айналасына ерекше жеміс ағаштарын егіп, абаттандыруды қолға алған.
Қазақстан – Орталық Азиядағы балық өсіру саласында ең қарқынды дамып келе жатқан және көшбасшы ел. Қазақстан Үкіметі аквакультураны стратегиялық сала ретінде қарап отыр. Мемлекеттік қолдау, инфрақұрылым мен технология, сондай-ақ аймақтық ықпалдастық тұрғысынан алғанда, Қазақстан бұл бағытта өзгелерге үлгі бола алады.
Бүгінде елімізде 400-ден астам балық өсіру шаруашылығы жұмыс істейді. Дені Түркістан облысында орын тепкен.