Қазақстанда 18 шілде – Қарулы күштердің әскери рәміздері күні. Бұл күн 1996 жылы ҚР Президентінің «Қарулы Күштердің әскери рәміздері туралы» Жарлығына қол қойылған сәтпен тығыз байланысты.
Әскери рәміздер – Отан қорғаушылардың моральдық-жауынгерлік рухын нығайтатын маңызды құрал ғана емес, сонымен қатар ұлттық болмыс пен мемлекеттілік белгісі. Олар сарбаздардың рухын көтеріп, әскери дәстүрлердің сабақтастығын сақтауға қызмет етеді.
Қазақстанның Қарулы күштеріне тиесілі рәміздер қатарына:
Қарулы күштердің символы (эмблемасы),
Мемлекеттік жалау мен Ту,
Құрлық әскерлерінің, Әуе қорғанысы күштерінің, Әскери-теңіз күштерінің тулары,
Әскери бөлімдердің жауынгерлік тулары жатады.
Қарулы күштердің символы – жиектері алтын жолақпен көмкерілген бес бұрышты жұлдыз. Жұлдыздың дәл ортасында күн сәулесі және астында қалықтаған қыран бейнеленген. Бұл белгі – қуаттылықтың, еркіндік пен биік рухтың нышаны.
Әрбір тудың өзіндік маңызы бар. Мысалы, жауынгерлік ту – әскери бөлімнің даңқты тарихын бейнелейтін қасиетті жәдігер. Ол сарбаздарға Отан алдындағы борыш пен ерлік дәстүрлерін әрдайым еске салып тұрады.
Ал әскер түрлеріне тиесілі туларда – әскери бөлімге қатыстылықпен қатар, ұжымның тұтастығы мен жауынгерлік ынтымағының символы бейнеленген.
Қазақстан Қарулы күштерінің рәміздері – патриотизм мен адал қызметтің, жауынгерлік серіктестіктің және тарихи дәстүрлердің жалғасын білдіретін бірегей ұлттық құндылық.