Бүгін Тайланд астанасы Бангкок қаласында Географиядан халықаралық олимпиада – International Geography Olympiad (IGeO) басталды. Бұл беделді жарысқа әлемнің 50-ден астам елінен 200-ге жуық үздік оқушы қатысып жатыр. Олимпиада 1 тамызға дейін жалғасады.
IGeO үш кезеңнен тұрады: жазбаша тестілеу, мультимедиялық тапсырмалар және далалық зерттеу туры. Қазақстан атынан олимпиадаға ел намысын қорғауға 4 жас географ-талант қосылды. Олар – Талдықорған, Қостанай, Ақтөбе және Қарағанды қалаларындағы Назарбаев Зияткерлік мектептерінің үздік оқушылары: Ақжол Болат, Андрей Енбахтов, Алихан Калмагамбетов және Талғат Байбусунов.
Ұлттық құраманы халықаралық және республикалық олимпиадалардың жеңімпазы Абай Дүйсен мен Қ.Сәтбаев атындағы Қазақ ұлттық техникалық университетінің студенті Рустам Валеев басқарады.
Географиядан халықаралық олимпиада 1996 жылдан бері Халықаралық географиялық одақтың қолдауымен өткізіліп келеді және оның басты мақсаты – оқушылардың география мен қоршаған ортаға деген қызығушылығын арттыру, сонымен қатар елдер арасындағы ынтымақтастықты нығайту.
Қазақстан бұл жарысқа 2012 жылдан бері тұрақты қатысып келеді. Өткен жылы құрамамыз 1 күміс және 3 қола медальге ие болып, жоғары нәтиже көрсетті.
Қазақстандық жас ғалымдарымыздың бұл олимпиададағы жетістіктері еліміздің білім мен ғылым саласындағы беделін одан әрі арттырып, халықаралық аренада еліміздің атын биікке шығаруда.