Қазақстан Республикасы Оқу-ағарту министрлігі 2026–2027 оқу жылына арналған бірінші сыныпқа қабылдау науқанының кезең-кезеңмен ұйымдастырылатын кестесін бекітті. Жаңа тәртіпке сәйкес, құжат қабылдау өңірлер бойынша әртүрлі мерзімде басталып, барлық аймақта 2026 жылдың 31 тамызына дейін жалғасады.
Қазақстан Республикасы Оқу-ағарту министрлігі бұл шешімнің негізгі мақсаты – ақпараттық жүйелерге түсетін жүктемені азайту және ата-аналар үшін өтініш беру процесін барынша ыңғайлы ету екенін атап өтті.
Шымкент қаласында бірінші сыныпқа құжат қабылдау 2026 жылдың 18 маусымында басталып, 31 тамызға дейін жалғасады. Осы кезеңде ата-аналар немесе заңды өкілдер балаларын мектепке тіркеу үшін қажетті құжаттарды тапсыра алады.
Құжаттарды бірнеше тәсілмен өткізу мүмкіндігі қарастырылған. Атап айтқанда, өтінішті OQU платформасы арқылы онлайн түрде беруге, «Электрондық үкімет» порталы (egov.kz) арқылы жолдауға немесе білім беру ұйымдарына тікелей барып тапсыруға болады. Сонымен қатар жергілікті атқарушы органдардың ақпараттық жүйелері де пайдаланылады.
Бірінші сыныпқа қабылдау үшін келесі құжаттар қажет:
- Ата-ананың немесе заңды өкілдің өтініші;
- №065-у нысанындағы денсаулық жағдайы туралы анықтама;
- №052-2/у нысанындағы баланың денсаулық паспорты;
- 3х4 сантиметр көлеміндегі екі фотосурет.
Өтініштер жұмыс күндері, яғни дүйсенбі мен жұма аралығында қабылданады. Мамандар ата-аналарға құжаттарды соңғы күндерге қалдырмай, алдын ала тапсыруға кеңес береді.
Айта кетейік, еліміздің басқа өңірлерінде қабылдау науқаны 27 мамыр, 10 маусым және 29 маусым күндерінен басталады. Ал Шымкент қаласының тұрғындары құжаттарды қабылдау науқанына 18 маусымнан бастап қатыса алады.