Шымкентте 9 айда 21 мектеп пайдалануға берілген. Бұл туралы бүгін Ақпараттық-коммуникациялық орталығының алаңында Шымкент қаласы білім басқармасының басшысы Нұргүл Шәмшиева 2023 жылдың 9 айында басқарма тарапынан атқарылған жұмыстар төңірегінде өткен баспасөз брифингте айтты.
– 2022 жылы 46 мектеп пайдалауға берілді. Оның 5-і мемлекеттік, 41-і жекеменшік мектептер. Ал, 2023 жылы 21 мектеп пайдалануға берілді. Нәтижесінде, үш ауысымда оқытатын 3 мектеп мәселесі толығымен шешімін тапты. Мемлекет басшысының тапсырмасына сәйкес, «Жайлы мектеп» ұлттық жобасын іске асыру мақсатында Шымкент қаласында 2025 жылға дейін 28 000 орындық 18 мектептің құрылысын салу жоспарлануда 2023 жылы 17 300 орындық 12 мектептің құрылысы басталды»-деді Шымкент қаласы білім басқармасының басшысы Нұргүл Шәмшиева.
Сонымен қатар 13 мектептің жобалық-сметалық құжаттамасы (ЖСҚ) дайындалды. 2023 жылы 500 орындық Оқушылар сарайы және 150 орындық Саз мектебі пайдалануға берілді. Бүгінгі таңда Тұран шағын ауданында 500 орындық 1 оқушылар сарайының құрылысы жүргізілуде. Одан бөлек, 1 колледжге 300 орындық қосымша құрылыс жүргізіліп, 2023 жылы пайдалануға берілетін болады. Ал 9 мекеме ғимараты күрделі жөндеуден өтуде, 4 мектепке спорт алаңшасы орнатылды.
Білім беру ошақтарын жаңа модификацияланған кабинетпен қамту бойынша 105 кабинет орнатылса, 48 кабинет және 299 интерактивті панельдер орнатылды. Нәтижесінде, пән кабинеттер үлесі 72%-дан 85% артқан. Оқушылардың қауіпсіздігін қамтамасыз ету үшін білім беру ұйымдарына 100% арнайы талаптарға сәйкестендірілген бейнебақылау жүйелері, турникеттер, дабыл батырмалары толығымен орнатылып, Полиция Департаментінің Жедел басқару орталығына қосылып, І-дәрежелі мамандандырылған күзетпен келісім-шарт түзілді деді.
Басқарма басшысы инфрақұрылым және материалдық-техникалық базаны дамыту, әлеуметтік қолдау, білім сапасы бойынша жүзеге асқан жұмыстарға да тоқтала кетті. Білім басқармасының мәліметінше, қалада мектептегі білім сапасы 56,2 %-ға дейін өскен. . Өткен жылы бұл көрсеткіш 51,1 пайызды құраған. Биыл 9 айдың қорытындысында 3 мектепке 2 000 оқушы орнын қамтитын қосымша ғимарат салынған. Оған қоса жаңадан 18 000 орындық 20-ға жуық жекеменшік мектеп ашылды. Нәтижесінде, қалада үш ауысымда оқытатын мектеп мәселесі толығымен шешімін тапқан.
—Білім беру ұйымдары 100% арнайы талаптарға сәйкестендірілген бейнебақылау жүйелері, турникеттер, дабыл батырмаларымен толығымен қамтылды. 134 228 оқушы ыстық тамақпен, 53 893 бала мектеп формасымен қамтамасыз етілді. «Жайлы мектеп» ұлттық жобасы бойынша Шымкентте 2025 жылға дейін 18 нысан салынады деп жоспарланған. Оның 12-нің құрылысы биыл басталды, — деді басқарма басшысы.
Есепті кезеңде қала оқушылары халықаралық және республикалық білім сайыстарынан 93 жүлделі орынға ие болды. Шымкент қаласында 2023-2024 оқу жылында 936 білім беру ұйымы жұмыс істейді. Өткен есепті кезеңмен салыстырғанда білім беру ұйымдарының желісі 48 бірлікке артқан.