Қалалық жинақ пунктінің алаңында ҚР Қарулы Күштері қатарына бірінші команданы салтанатты түрде шығарып салу рәсімі ұйымдастырылды. Іс-шараға Шымкент қаласы әкімінің бірінші орынбасары Қуаныш Асылов, қалалық қорғаныс істері жөніндегі Департаментінің бастығы полковник Әбдіғабит Шегебаев, әскери сала ардагерлері, жас сарбаздардың туыстары мен жақындары қатысты.
Жаңадан Отан қорғаушылар алдында қала әкімінің орынбасары Қуаныш Асылов сөз сөйледі. Ол әскердегі қызмет — әрбір азаматтың қасиетті борышы және әрбір отбасының тыныштығының кепілі екенін атап өтті. Сондай-ақ, жас сарбаздарға сәттілік тіледі.
— Ата-баба мұрасына лайық болу — әр ұрпақтың міндеті. Сіздер біздің еліміздің бейбітшілігі мен жеріміздің тұтастығын сақтауға жанқиярлықпен қызмет ететін батыл жауынгер болатындарыңызға сенеміз. Әскери борышты абыроймен орындап, аман-есен оралыңыздар! — деді Қуаныш Жұмабекұлы.
Сондай-ақ, Қарулы Күштер ардагерлері қалалық кеңесінің төрағасы отставкадағы полковник Серікбай Оңбаев әскерге шақырылушыларға ақ жол тілеп, елдің қауіпсіздігін сақтау оның әрбір азаматының аса маңызды міндеті екенін атап өтті. Қорғаныс істері департаментінің бастығы Әбдіғабит Шегебаевтың айтуынша, бүгінгі күні ҰҚК Шекара қызметіне күзгі шақыру жоспарына сәйкес үшінші мегаполистен медициналық және психологиялық комиссиядан өткен 170 әскерге шақырылушы жіберілді. Бұдан басқа, бүгіннен бастап Қарулы Күштер қатарына әскерге шақыру жасындағы 450-ге жуық азамат шақырылады. Ал күзгі шақыру науқаны осы жылдың 31 желтоқсанына дейін жалғасады.
— Біздің еліміздің қазіргі армиясында мерзімді әскери қызмет өткеру үшін қолайлы жағдайлар жасалған. Әскери қызмет тек бір жылды құрайды және байқалмай өтіп кетеді, ал аяқталғаннан кейін әр сарбаз еліміздің жоғары оқу орындарына тегін түсуге немесе келісімшартқа қол қойып, кәсіби әскери болуға мүмкіндік алады, — деп қорытындылады Әбдіғабит Шегебаев.
Шақыру науқанының жоспарына сәйкес бірінші кезекте ҰҚК Шекара қызметінің бөлімшелері, Мемлекеттік күзет қызметі, содан кейін – Қарулы Күштердің әскери бөлімдері, Төтенше жағдайлар министрлігі мен Қазақстан Республикасы Ұлттық ұланы жасақталатынын атап өткен жөн. Ал төрт айдың ішінде Шымкенттен 18-27 жас аралығындағы 900-ден астам әскер шақырылады.
Айта кетейік, әскерге барған жастарға жеңілдіктер де қарастырылған. Мәселен, өткен жылы күшіне енген Заңға сәйкес, әскерге барған азаматтар еліміздің ЖОО-на, ҰБТ тапсырмай гранқа түсу мүмкіндігіне ие. Сондай-ақ, банкте берешегі бар азаматтардың бір жылдық өтемі кешіріледі.