Мемлекет басшысы Қасым-Жомарт Кемелұлы «Таза Қазақстан» акциясы науқандық емес, тұрақты дағдыға айналатын бастама екенін айтты. Осы бастаманы қолдап, бүгін киелі Ордабасы ауданында облыстық мәслихат төрағасы Нұралы Әбішов халықпен бірге тал егіп, ауданның тазалық жұмыстарын жүргізді. Игі іске Ордабасы ауданының әкімі Азат Оралбайұлы, облыс мәслихатының депутаты Ғани Райымбеков және аудандық мәслихат төрағасы, ауыл тұрғындары мен жастары, ақсақалдар қатысты.
Түркістан облысында «Таза Қазақстан» акциясы өте жоғары деңгейде жалғасып жатыр. Үш апта көлемінде мыңдаған көшет отырғызылып, елді мекендер мен көшелер тазаланды. «Киелі мекен» апталығында Нұралы Әлмаханұлы жалпы халықты, өңір жұртшылығын сенбілік жұмыстарын жасауға, әр тұрғын тазалықты өзінен бастап, жерімізді қоқыстан арылтуға жұмыла атсалысуға шақырды.
Айта кетейік Мемлекет басшысы Қасым-Жомарт Тоқаевтың тапсырмасымен елімізде «Таза Қазақстан» экологиялық акциясы 5 кезеңнен тұрады:
«Таза өлке» апталығы (6-13 сәуір);
«Киелі мекен» апталығы (14-20 сәуір);
«Жасыл аймақ» апталығы (21-27 сәуір);
«Өнегелі ұрпақ» апталығы (28 сәуір – 4 мамыр);
«Мөлдір бұлақ» апталығы (5-11 мамыр) атты тақырыптық бағыттарда ұйымдастырылады.