Интернет-алаяқтықтың профилактикасы және оған қарсы іс-қимыл туралы халықты егжей-тегжейлі ақпараттандыру мен цифрлық сауаттылықты арттыру бойынша қала әкімдігінде арнайы семинар өтті. Шымкент қалалық цифрландыру басқармасы ұйымдастырған іс-шараға Полиция департаментінің арнайы өкілдері, ЖОО-ның тәрбие ісі жөніндегі проректорлары, жастармен жұмыс жасайтын комитет төрағалары, «Жастар ресурстық орталығы» КММ басшылық құрамы қатысты.
Шымкент қаласы ПД КПБ аға жедел уәкілі, полиция майоры Нұрсұлтан Жұмабай баяндама жасап, интернет алаяқтықтың негізгі түрлері, одан сақтанудың жолдарын түсіндіріп берді.
«Интернет алаяқтықтың басқа қылмыстардан басты ерекшелігі – қашықтықтан жасалуында. Және бүгінгі уақытта негізінен бес кең тараған түрі бар. Атап айтқанда, ұялы телефонға хабарласып, өздерін банк өкілімін деп таныстыратын, іс-әрекеті күмәнді жағдайларға жиі куә болып жүрміз. Интернет желісінде түрлі танымал компаниялардың атын жамылып, инвестиция құюға шақырады. 2023 жылдың қорытындысы бойынша интернет алаяқтары келтірген шығын көлемі 900 млн теңгені құрайды. Бұл – үлкен мәселе. Алдын алу бағытында департаменттің киберпол тобы және прокуратура өкілдерімен меморандум түзілген. Прокуратура өкілдерінің бізге көп жәрдемі тиюде. Интернет-алаяқтар күнде жаңа әдіс ойлап табады. Біз олардан қалмай, керісінше олардың алдында жүруіміз керек. Бүгінде жастармен, оқу орындарымен жиі кездесулер өткізілуде. Аталған қылмыспен барлығымыз жұмыла, бірлесе күресуіміз керек,-деді Шымкент қаласы ПД КПБ аға жедел уәкілі, полиция майоры Нұрсұлтан Жұмабай.
Сондай-ақ, интернет-алаяқтық істер «Инстаграм» әлеуметтік желісі, «Колеса», «ОЛХ», «Крыша» секілді сайттар мен «Каспий», «Еуразия», «Халық» интернет банкингтерін қолдану арқылы жасалады. Интернет-хабарландырулар бойынша тауар мен қызмет үшін алдын ала төлем не толық сома алу, микрокредиттік ұйымдардың сайттарында жалған онлайн-қарыздар ресімдеу, банк қызметкерінің атынан қоңырау шалу арқылы банк шоттарынан ақша қаражатын жымқыру жағдайлары жиі орын алып отыр.
Күмәнді қоңыраулар, сілтемелерден аулақ болыңыз, оқырман!